तनहुँ जिल्लाको दक्षिणपूर्वी भागमा कालीगण्डकी र त्रिशूली नदीको सङ्गमस्थल, प्राचीन पुराणहरुमा आदिप्रयाग हरिहर क्षेत्रका नामले वर्णित देवताहरुको तपोभूमी देवघाट नेपालकै एक पवित्रतम तीर्थस्थल हो । तपस्वी अष्टाङ्ग योगसिद्ध ईश्वरानन्द ब्रह्मचारी (गलेश्वर बाबा)ले आफ्नो साधनास्थलको रुपमा कालीगण्डकीलाई पच्छ्याउने क्रममा वि.सं. १९८० सालमा म्याग्दीबाट देवघाट आई कुटी निर्माण गरी आश्रमको स्थापना गर्नुभयो । गलेश्वर बाबाले  संस्कृतिको आधारशिला संस्कृत वाङ्मय हो भन्ने मर्मलाई हृदयङ्गम गरी वैदिक सनातन धर्मबाट समस्त मानवजातिको कल्याण होस् भन्ने उद्देश्य राखी वि.सं. २०२३ साल पौष २७ गते पृथ्वी जयन्ती (राष्ट्रिय एकता दिवस) का दिन श्री वदे वेदाङ्ग विद्यालयको नामबाट गुरुकुलीय शिक्षापद्धति अनुसार संस्कृत पाठशालाको स्थापन गर्नुभयो । विद्यालयको अभिलेख अनुसार यस विद्यालयले वि.सं.२०२४ साल चैत्र १२ गते अस्थायी अनुमति पाई गुरुकुलीय पद्धति अनुसार वेदाध्ययन गराउँदै आएको थियो ।

वि.सं.२०३२ साल जेष्ठ शुक्ल द्वितीयाका दिन बाबा ब्रह्मलीन (अन्नमय कोश परित्यक्त) भएपश्चात् आश्रमका दोस्रो पीठाधीशका रुपमा बाबाका ब्रह्मचारी शिष्य सन्त श्री १००८ स्वामी आशुतोषानन्द सरस्वतीजी महाराज रहनु भयो आश्रम र गुरुकुल सञ्चालनलाई निरन्तरता दिनुभयो । त्यसपछि आश्रमका तेस्रो पीठाधीशका रुपमा वि.सं.२०४३ सालदेखि राष्ट्रसन्त श्री १००८ स्वामी परमानन्द सरस्वतीजी महाराज रही निरन्तर रुपमा आश्रम र गुरुकुल सञ्चालन गर्नुभयो । त्यसपछि वि.सं.२०५३ सालमा यस आश्रमलाई भौतिक,शैक्षिक,सामाजिक र सांस्कृतिक रुपमा विकास गर्नसक्ने योग्य तपोनिष्ठ क्षमतावान् सन्त हालका पीठाधीश अनन्तश्रीविभूषित महामण्डलेश्वर स्वामी आत्मानन्द गिरिजी महाराजलाई सन्त परम्परानुसार पीठको जिम्मा लगाउनु भयो तत् पश्चात महामण्डलेश्वर स्वामीजी महाराजको कुशल एवं वरद नेतृत्वमा आश्रमले संस्थागत स्वरुप प्राप्त गर्न सफल भयो । वर्तमानमा भौतिक, सामजिक, धार्मिक, आध्यात्मिक र शैक्षिक विकासमा पूर्णता प्राप्त गरी अग्रगामी फड्को मार्न सफल भएको छ ।